I measc na gceoltóirí a bheas ar an ardán ag Focal sa Factory beidh cuid acu sin a bhí le cloisteáil ag an Phicnic, mar atá Fiach, Ophelia, Bubba Shakespeare agus Enda Reilly.

Eagraithe ag Seachtain na Gaeilge agus Club Sonas, beidh Grúpa Tí Sonas ag casadh don chéilí mór agus beidh Sibéal Davitt, Darach Mac Mathúna, Cormac Murphy agus Mairéad Hurley ag cur an Sexy Sean Nós i láthair.

Athróidh an ceol go hiomlán ansin nuair a sheinnfidh DJ de chuid Raidió na Life, Stephanie Nic Aonghusa, na hamhráin is cailiúla le fonn!

Tá ticéid ar fáil tríd an choras Pay Pal ar www.clubsonas.com, áit a bhfuil físeáin agus tuilleadh eolais mar gheall ar aíonna na hoíche.

Is féidir iad a cheannach chomh maith ó Chonradh na Gaeilge, BÁC, agus ón Button Factory ar an oíche.

Osclaíonn na doirse ar 8in agus tá €10 ar an doras nó €7 do mhic léinn.

Comórtas d’amhráin nua-chumtha sna teangacha Ceilteacha – chomh maith leis an Albainis agus Albainis Uladh – atá i gceist le Nòs Ùr atá á reáchtáil don dara bliain as a chéile agus óna rachaidh an buaiteoir iomlán ar aghaidh chuig Liet, babhta ceannais na mionteangacha Eorpacha, san Ísiltír i mí Dheireadh Fómhair.

Tá na Gaeil san iomaíocht arís i mbliana le Fiach ag ceol ‘Sea Táim’ agus Enda Reilly le ‘Mol an Aimsir’, agus tá an ceoltóir as contae Aontroma, Malachy Duffin, a bhfuil neart amhrán Gaeilge déanta aige, ag canadh in Albainis Uladh an babhta seo chomh maith.

Bidh Sunrise Not Secular, Mary Ann Kennedy agus Na Gathan – còmhlan a bheil sgrìobhadair nós*, Tim Armstrong, ann – a’ gabhail òran ann an Gàidhlig.

“Bhí líon agus éagsúlacht na n-iarratas iontach ar fad,” arsa Brian Ó hEadhra, eagraí Nòs Ùr.

“Fuair muid amhráin i nGaeilge na hAlban agus na hÉireann, Albainis, Albainis Uladh, Breatnais, Coirnis agus Briotáinis.

“Síleann daoine go minic go gcaithfidh amhráin sna teangacha seo bheith traidisiúnta ach tugann an comórtas seo dúshlán an dearcaidh sin. Tá gach cineál stíl cheoil sa bhabhta ceannais – rac, pop, rap agus fuaimiúil – ó cheoltóirí agus bannaí as gach cuid de na réigiúin Cheilteacha agus Albanacha.

“Duine ar bith a bheas ann ar an oíche, rachaidh an ceol agus gairmiúlacht na gceoltóirí go mór i bhfeidhm orthu – is cinnte go bhfuil sé chomh maith céanna leis an Eurovision nó an X Factor!”

Beidh an chraobh cheannais ar siúl 20 Meitheamh – tá sé saor in aisce do dhaoine faoi 16 – agus is iad saineolaithe ceoil agus an pobal féin a dhéanfaidh an vótáil ar an oíche.

Seo a leanas iomaitheoirí Nòs Ùr 2009:

• Àdhamh MacLeòid; Jist The Grain (Scots)
• Fiach; Sea Táim (Gaeilge)
• Iwan B; Fulenn (Brezhoneg)
• Malachy Duffin; I Dinnay Gie a Hoot (Hamely Tongue)
• Mary Ann Kennedy; Mise Fhuair (Gàidhlig)
• Na Gathan; Claigeann Damien Hirst (Gàidhlig)
• Phile Innes & Josie Boucharde; Kernewek Ov Vy (Kernewek)
• Sunrise Not Secular; Lasair An t-Oidhche (Gàidhlig)
• Masters in France; Y Rhai Gwyllt (Cymraeg)
• Enda Reilly; Mol an Aimsir (Gaeilge)

Is féidir na hamhráin ar fad a chloisteáil ar www.myspace.com/nosur agus tá breis eolais faoin chomórtas le fáil ag www.nos-ur.eu

Le bheith san iomaíocht, ní gá ach freagra na ceiste seo a leanas, mar aon le d’ainm agus seoladh, a chur chuig duais@nosmag.com roimh 18 Aibreán.

Ádh mór!

Cárb as don gceoltóir Fiach?

Ón bharr: Ian Dempsey agus Bláthnaid Ní Chofaigh; Rónán Mac Aodha Bhuí agus Aoibhinn Ní Shuilleabháin; Declan O’Rourke le cuid den slua a bhí i láthair sa Button Factory; Fiach i mbun ceoil ar an ardán.

Grianghraif: David Fleming

Seolfar Seachtain na Gaeilge 2009 sa Button Factory in Ionad Ceoil Bharra an Teampaill, BÁC, amárach 25 Feabhra.

Blathnaid Ní Chofaigh agus Ian Dempsey a sheolfaidh an fhéile agus in éineacht leo beidh cuid de na ceolróirí a bheas le cloisteáil ar albam SnaG na bliana seo – Ceol ‘09 – Declan O’Rourke, Fiach, Saccade agus Pádraig Ó Sé ina measc.

Táthar ag cur baillchríche ar an albam faoi láthair agus seolfar é i mí Mhárta.

Ar na hamhráin atá san áireamh i mbliana tá Falling Slowly, a bhuaigh Oscar anuraidh don Amhrán Nua is Fearr, agus leagan Gaeilge d’amhrán iontach Mick Flannery, Tomorrow’s Papers.

Tá iontrálacha ann ó bheirt amhránaithe a bhfuil ardchlú bainte amach acu le tamall, mar atá Duke Special agus Cathy Davey agus beidh an Speall é féin, John Spillane, ann chomh maith lena leagan féin de An Poc ar Buille.

Beidh tuilleadh faoi Ceol ’09 ar eagrán Márta nós* agus tosaíonn an chraic ar fad sa Button Factory ar 6in.

Tosóidh Seachtain na Gaeilge féin ar 2 Márta agus leanfaidh sé ar aghaidh go 17 Márta.