Tá sé deacair a chreidiúint go bhfuil an spraoi craiceáilte atosaithe arís ó bhí Lúnasa 2008 ann agus is iomaí imeacht den scoth atá curtha ar fáil ag muintir an Chabaret ó shin i leith, ní amháin i nGaoth Dobhair ach ar fud na tíre chomh maith, le cuid de na himeachtaí chomh maith sin nach féidir cuimhniú orthu!

Tógra iomlan deonach é an Cabaret a bhíonn á eagrú ag an réalta raidió Rónán Mac Aodha Bhuí agus a bunaíodh chun ardán a thabhairt do cheoltóirí áitiúla agus eile a bhíonn i mbun ceoil as Gaeilge agus chun saol siamsa sóisialta sa teanga a spreagadh sa Ghaeltacht agus san iar-Ghaeltacht araon.

Míníonn Rónán gur siar sa bhliain 1993 a cuireadh síolta Chabaret an lae inniu.

“Tháinig An Ciorcal Craiceáilte ar an saol in 1993 ar mhaithe le saol sóisialta lán-Ghaelach a chruthú, chomh maith le tionscal ceoil chomhaimseartha trí Ghaeilge a spreagadh agus a chothú,” arsa sé.

“Tá an meon sin go fóill beo inniu, tá sé ag neartú arís, agus tá lúchair orm go bhfuil ag éirí linn na haidhmeanna sin a chur i gcrích, go deonach agus ar bheagán achmhainní.

“De réir a chéile, tá an soiscéal ag spréadh go bhfuil rudaí maithe ag tarlú, go bhfuil an chraic sa cheol agus go bhfuil muid bródúil. Tá an taobh sóisialta den Ghaeilge iontach tábhachtach mar tugann sé deis do dhaoine bualadh le chéile agus cuireann sé in iúl go bhfuil beocht ar leith i saol na teanga.”

Luann Rónán go bhfuil sé fíor-bhuíoch do na ceoltóirí uilig a bhíonn páirteach sa Chabaret, chomh maith leis an lucht gnó áitiúil a thugann tacaíocht dóibh.

“Bíonn imeachtaí den chineál seo ag tarlú mar go bhfuil daoine sásta cuidiú a thabhairt ar bhonn rialta agus tá Réabhlóid An Cheoil (RAC) go mór faoi chomaoin acu,” ar seisean.

“Ní fhéadfaí an Cabaret a choinneáil beo, mar shampla, gan an cuidiú a thugann leithéidí Ealaín na Gaeltachta, obair dheartha Chaomháin Uí Scolaí, Teach Hiúdaí Beag, Teach Sheáin Óig, Ollmhargadh Uí Ghallchóir, Teach Chambell, Siopa Mhatt, Busanna McGinley agus Feda agus araile.

“Ar a bharr sin meallann an Cabaret cuid mhór cuairteoirí go Gaoth Dobhair achan mhí, rud atá maith don cheantar agus a léiríonn arís eile an borradh atá faoi chúrsaí Gaeilge i láthair na huaire.”

Cé gurb í Gaeltacht Thír Chonaill baile an Chabaret bíonn sé ar cuairt go minic in áiteanna eile sa tír agus le trí bliana anuas bhí ócáidí craiceáilte ar siúl sa Phuball Gaeilge ag Electric Picnic, ag Fleadh Feirste i mBéal Feirste, ceiliúradh na Féile Pádraig i mBaile Átha Cliath, Féile Oirialla i Muineachán, Pléaráca Chonamara, Oileán Thoraí agus eile.

Ar an mhí seo chugainn beidh sé ar ais i mBéal Feirste faoi choinne cheiliúradh mór 20 bliain Chultúrlann McAdam Ó Fiaich nuair a osclóidh an tUachtarán Máire Mhic Ghiolla Íosa síneadh úr an fhoirgnimh agus a cheolfaidh grúpa iontach John McSherry, The Soma Band.

Bíonn cuid de na ceoltóirí traidisiúnta is fearr, na bannaí Gaeilge is nuálaí agus na damhsóirí sean-nóis is gnéasúla in Éirinn le cloisteáil agus le feiceáil ag an Chabaret ar bhonn rialta agus is amhlaidh an scéal chomh maith don tríú breithlá oíche amárach i dTí Hiúdaí.

Beidh an t-amhránaí cumhachtach Feirsteach, Gráinne Holland, a bhfuil a céad albam Teanga na nGael díreach eisithe aici, ar an ardán in éineacht le Feilimí O’Connor, Rohan Young, Mark Kane agus Conor Caldwell.

Cuirfidh na deartháireacha ceolmhara as Cill Mhantáin, Mo Hat Mo Gheansaí, a n-amhráin nuachumtha i láthair agus beidh Na Muca Mire, Na Scoodelys agus ceoltóirí eile i mbun aicsin chomh maith.

Is léir mar sin go ndéanfar ceiliúradh mór maith ar na trí bliana atá curtha isteach ag an Chabaret go dtí seo, agus bí cinnte go mbeidh go leor ábhar eile ceiliúrtha ag Gaeil chraiceáilte amach anseo.

Mar a deir an tUasal Mac Aodha Bhuí é féin; “Cuirigí críoch ceart leis an samhradh agus bainigí sult as an réabhlóid Chraiceáilte!”

Tomaí Ó Conghaile

Tá an sár-ghrúpa reggae agus sca, Bréag, ar ais don tríú huair le lucht Thigh Hiúdaí a chur i mbun damhsa agus táthar ag súil go mór le tiúineanna spraíúla na leaids seo as Gaeltacht Bhéal Feirste, atá ceangailte leis an ghluaiseacht Chraiceáilte ón fhíor-thús 17 bliain ó shin.

Beidh racairí na príomhchathrach, The Dirty Nines, (ar clé) ann chomh maith – banna a bhuaigh an comórtas ceoil Deis Roc cúpla bliain ó shin – agus dar le Cian McCarthy ón ghrúpa nach féidir leo fanacht le dul amach ar an ardán clúiteach Gaelach.

“Seo an chéad uair riamh dúinn bheith ag seinm i dTír Chonaill,” arsa sé.

“Chuala muid rudaí iontacha faoin Chabaret ó Henrietta Game agus dá bharr sin tá muid ag siúl go mór leis an gceolcoirm!”

Is é Macdara Ó Conaola, amhránaí an-chumasach as Inis Oírr, a bheas ag déanamh ionadaíochta ar an cheol traidisiúnta ar an oíche agus beidh a chomrádaí ceoil, Camille Champarnaud as Páras na Fraince, in éineacht leis chomh maith le blas idirnáisiúnta ar chur ar an ócáid.

Is i dTigh Hiúdaí, An Bun Beag, a bheas an Cabaret ar siúl mar is gnáth agus osclófar na doirse ar 8.30in. Níl ach €5 ar chead isteach.

Mar a deir an tUasal Mac Aodha Bhuí é féin; “Déanaigí dearmad ar an phrácás atá déanta ag lucht gaimbín den tír agus bainigí sult as an réabhlóid Chraiceáilte!”

Seo tréimhse na bhféilte ceoil agus cé nach bhfuil féile iomlán dírithe ar nuacheol Gaeilge againn sa tír seo – go fóill – tá ár gcairde thall i gCymru ag canadh leo i gcónaí agus an deireadh seachtaine seo cuirfear tús le féile úrnua Bhreatnaise.

Beidh Y Ffin – a chiallaíónn ‘An tImeall’ – ar siúl in Yr Wyddgrug/Mold i dtuaisceart na Breataine Bige agus beidh rogha na ngrúpaí comhaimseartha Cymraeg, mar aon le hAngla-bhannaí roc agus pop ón tír, ag cur an tsiamsa ar fáil do na sluaite.

Eagraithe ag an eagras teanga Mentrau Iaith Cymru, tháinig Y Ffin ar an fhód i ndiaidh dóibh taighde a dhéanamh ar cad a bhí ag teastáil ó dhaoine óga an cheantair.

“Ba léir ón taighde a rinne muid go raibh daoine óga anseo i Sir y Fflint ag iarraidh féile cheoil a thug ardán do ghrúpaí nua Breatnaise agus grúpaí Béarla as Cymru araon,” arsa Stiúrthóir Mentrau Iaith, Gwawr Cordiner.

“Beidh réimse leathan imeachtaí ar siúl thar an deireadh seachtaine, iad ar fad ar fáil go dátheangach, agus ní gá do dhaoine bheith buartha faoin ghéarchor creidmheasa mar tá gach rud saor in aisce.”

Ag barr an chláir tá an banna Sibrydion, ceoltóirí pop atá lonnaithe i gCaerdydd, agus na draoithe funcaí-áilte Derwyddon Dr Gonzo, a mheascann ska le líricí snasta Breatnaise.

Breis eolais ag www.yffin.co.uk

Agus ag caint ar imeachtaí ceoil “ar an imeall”, níl mórán áiteanna níos imeallaí ná imeall na hEorpa féin agus beidh an Cabaret Craiceáilte ag titim amach ansin, bhuel i dTigh Hiúdaí Bhig ar an Bhun Beag i nGaoth Dobhair le bheith beacht, De Sathairn seo 25 Iúil.

Is iad na Clubmen a bheas mar phríomhcheoltóirí na hoíche agus osclaíonn na doirse ar 10in, le €5 cead isteach.

Seo an liosta, má tá tú sa cheantar, buail isteach!

Bhailigh slua breá isteach san Odeon, Baile Átha Cliath, 16 Márta leis an tallann Ghaelach is úire agus is spleodraí ar domhan a fheiceáil agus a chloisteáil ag an Cabaret Craiceáilte.

Beidh gghraif eile againn anseo agus sa chéad eagrán clóite go luath ach le blaiseadh beag a thabhairt daoibh ar chraic na hoíche, seo cúpla pic ón ócáid iontach.

Ón bharr, tá MC Muipéad agus Jimmy the Hideous Penguin; Máire Áine Ní Iarnáin i mbun damhsa; Bubba Shakespeare agus a bhanna; agus, ar chlé, an ceoltóir óg Dáithí Ó Drónaí.

Tuilleadh le teacht!

Tá oíche mhór cheoil Ghaoth Dobhair, An Cabaret Craiceáilte, ag dul ó neart go neart agus Dé Sathairn 28 Feabhra bhí ócáid eile spleodrach ann nuair a bhí an banna reggae Gaeilge is fearr ar domhan, Bréag, istigh leis an slua a chur ag bogadh.

Ón bharr, tá cuid den scaifte i mbun damhsa i dTigh Hiúdaí Bhig, An Bun Beag; Caoimhín Mac Giolla Catháin agus Peter Benson de chuid Bréag; Gráinne Holland, amhránaí leis an ghrúpa Casadh; agus fear an tí é féin, Rónán ‘Beo@3′ Mac Aodha Bhuí in éineacht le Róise Nic Corraidh agus Gráinne.

Beidh an chéad Chabaret Craiceáilte eile ar siúl san Odeon, Sráid Fhearchair, Baile Átha Cliath, Dé Luain 16 Márta mar chuid de SnaG.