Ní ar éadaí chainteoirí Gaeilge atá muid ag trácht go díreach, ach ar na comharthaí sin a chuireann in iúl go bhfuil an chéad teanga náisiúnta ar ár dtoil againn.

Le fada an lá, ba é an Fáinne an t-aon bhealach le tabhairt le fios go raibh Gaeilge agat ach le déanaí tá an iliomad suaitheantas agus eile tar éis theacht ar an saol agus iad anois ar taispeáint ag Gaeil áirithe i gcéin agus i gcóngar.

Ní hionann agus roinnt pobal teanga eile san Eoraip, áfach, ní nós an-choitianta é anseo comhartha a úsáid le cur in iúl gur cainteoir Gaeilge tú, agus tá gach siombail nó suaitheantas atá againn éagsúil óna chéile gan aon ghné choitianta acu.

An bhfuil sé in am dúinn mar sin siombail úr a aimsiú don Ghaeilge, comhartha a bheadh in úsáid againn ar fad ar bhealach amháin nó eile?

D’fhéadfadh siombail láidir nua ár bpobal a neartú agus a dhéanamh níos feiceálaí.

D’fhéadfaí é a úsáid ar t-léinte, greamáin, suaitheantais, bratacha, fógraí, siopaí, bialanna, agus fios láithreach ag cách gur cainteoir Gaeilge tú nó go bhfuil Gaeilge á labhairt in áit ar leith.

B’fhéidir gur leagan úr den Fháinne é (le G don Ghaeilge b’fhéidir?)… cá bhfios, ach cuirimis tús leis an bplé!

Cad é a cheapann sibh féin?

Nuair a chuir muid tús leis an iris ar líne i Márta 2008, agus ansin nuair a cuireadh an chéad eagrán den leagan gnéasúil clóite ar fáil ag tús 2009, bhí foireann nós* ag fíorú físe.

An fhís a bhí againn ná cur leis na meáin Ghaeilge ar bhealach spreagúil ardchaighdeáin a chuirfeadh leis na seirbhísí atá ar fáil do phobal na Gaeilge agus a mheallfadh daoine nua i dtreo ár dteanga iontaí.

Chabhraigh go leor daoine – rannpháirithe, síntiúsóirí, tacadóirí – chun an fhís sin a fhorbairt agus tá buíochas agus meas tuillte acu sin ar fad a chuidigh linn an dul chun cinn a dhéanamh.

Bhí muid dóchasach i gcónaí go meallfadh an t-éacht seo maoiniú éigin chun cuidiú leis an togra ach, ar chúiseanna éagsúla, níor mheall agus ba ar fhógraí agus ar shíntiúis amháin a bhí an iris ag brath.

Sa deireadh, ba dhúshlán ró-mhór é sin sa ghéarchéim reatha eacnamaíochta agus bhí orainn sos a thabhairt don iris mhíosúil chlóite.

Ní deireadh é sin do nós* clóite áfach mar ón lá inniu tá forlíonadh speisialta nós* á fhoilsiú leis an nuachtán náisiúnta Gaelscéal!

“Yee haa!” a deir sibh, agus bheadh an ceart ar fad agaibh mar is gnáth-mheascán d’ábhar spleodrach nós* atá i gceist leis an fhorlíonadh, a fhoilseofar ar an Aoine dheiridh de gach mí.

Tá gliondar orainn an comhoibriú seo a dhéanamh le Gaelscéal, atá tar éis dul i bhfeidhm go mór ar dhaoine ó seoladh é ní ba luaithe i mbliana, agus tá áthas orainn go mbeidh nós* á léamh i lámha an phobail arís.

Mar sin níl le déanamh agat ach cóip de Gaelscéal agus nós* a aimsiú agus sult a bhaint as ár léirmheasanna ceoil, scannáin, idirlín, tuairisc ar Ghaelú Electric Picnic, Féile Bhéal Feirste agus eile!

Ar ndóigh beidh teacht ar an ábhar anseo ar nosmag.com chomh maith mar sin bígí cinnte go gcoinníonn sibh súil ar leathanaigh an tsuíomh!

Liosta de shiopaí a bhfuil Gaelscéal ar fáil anseo.

Forlíonadh nós* le léamh ar líne anseo.

Am speisialta, draíochta fiú, den bhliain é seo ina ngabhann muid buíochas as gach dá bhfuil againn agus ina ndéanann muid ceiliúradh le clann agus cairde.

Tá nós* ag déanamh ceiliúrtha chomh maith ar bhliain iontach d’fhoilsiú ar líne agus i gcló. Tá an-dul chun cinn déanta ag an iris ó tháinig sí ar an saol i Márta 2008 agus tá muidne, foireann nós*, an-bhuíoch ar fad as an tacaíocht atá faighte againn ó léitheoirí i gcongar is i gcéin.

Mar chomhartha ar an bhuíochas sin, gheobhaidh sibh físeán speisialta – Teachtaireacht nós* na Nollag – anseo thíos agus sa rannóg Físeáin.

Is tús é an físeán seo le forbairt nua ar nosmag.com ina mbeidh tuilleadh físeán dár gcuid féin á fhoilsiú againn ar bhonn rialta – coinnigh súil amach lena aghaidh seo sa bhliain úr.

Athrú eile a bheas le feiceáil in 2010 ná go bhfoilseofar an leagan clóite de nós* gach dara mí. Is togra deonach é nós* nach bhfaigheann aon mhaoiniú mar sin cabhróidh sé seo le cúrsaí airgid agus cuirfidh sé ar chumas na foirne eagráin níos suntasaí a chur ar fáil agus dul chun cinn leanúnach a chur i gcrích.

Tá foireann nós* paiseanta faoin táirge a chuireann muid ar fáil ar líne agus i gcló agus, le cabhair ár bpobail léitheoireachta, rachaidh muid ag forbairt agus ag cur leis an iris sa tréimhse amach romhainn.

Míle buíochas arís le nósadóirí an domhain, bígí ag súil leis an chéad eagrán clóite eile ag tús na bliana nua agus bainigí súp as na laethanta saoire!

Má cheannaíonn tú síntiús bliana don leagan clóite de nós* roimh Lá Nollag, cuirfear d’ainm san iomaíocht le haghaidh 2 ticéad fillte ó Éirinn go Londain.

Tá an tairiscint oscailte do gach aon duine a ghlacann amach síntiús linn sa tréimhse sin agus beidh an té ádhúil, agus cara leo, in ann na heitiltí a úsáid aon am le linn 2010.

Mar sin ná bíodh aon mhoill eile ort agus ceannaigh síntiús linn inniu!

SÍNTIÚIS ANSEO – SUBSCRIPTIONS HERE

Tugadh aitheantas dúinn ar dtús ag na Irish Webs Awards ag tús mhí Dheireadh Fómhair nuair a bronnadh an gradam, ‘An Suíomh Gaeilge Is Fearr’, ar www.nosmag.com agus aithníodh ardchaighdeán ár n-eagrán clóite chomh maith nuair a fógraíodh an mhí seo gur éirigh le nós* áit a bhaint amach ar an ghearrliosta le haghaidh ‘Best Consumer Magazine’ i nGradaim Irisí na hÉireann, an chéad fhoilseachán Gaeilge le hainmniúchán a fháil ann riamh.

Ar a bharr sin, tá bunaitheoir agus eagarthóir nós*, Tomaí Ó Conghaile, tar éis babhta ceannais ‘Eircom NI Young Entrepreneur of the Year’ a bhaint amach mar gheall ar an obair atá déanta aige leis an iris.

Ní gá a rá go bhfuil gliondar an domhain orainn as an aitheantas seo ar fad agus is léiriú é ar an obair iontach – agus deonach go dtí seo! – atá ar siúl ag rannpháirtithe nós* le bliain go leith anuas.

Tá buíochas ag gabháil chomh maith dár léitheoirí a léann an iris anseo ar líne agus i gcló gach mí – dá mbeadh gradam ann don phobal léitheoireachta is fearr, thabharfaimis daoibhse é!

Tá nosmag.com ar an ghearrliosta sa rannóg ‘An Suíomh Gaeilge Is Fearr’, agus is cinnte go mbeidh iomaíocht ghéar idir na Gaeil is gnéasaí ar an ngréasán! Is féidir na gearrliostaí a léamh thall ag suíomh Irish Web Awards.

Bronnfar na gradaim éagsúla ag ócáid speisialta i mBaile Átha Cliath 10 Deireadh Fómhair agus tá súil ag foireann nós* go mbeidh muid in ann sos a ghlacadh ón obair agus bheith i láthair ar an oíche!

Agus ag caint ar nosmag.com, tá conradh fógartha ag Foras na Gaeilge le haghaidh irise Gaeilge ar líne, a mhairfeadh trí bliana. Breis eolais anseo.

Ní gá dúinn a rá go mbeidh nós* ag cur isteach ar an chonradh seo – a chuirfeadh go mór le seirbhísí an tsuímh dá mbainfeadh muid é – agus coinneoidh muid ar an eolas sibh faoi sin, agus faoi aon fhorbairt eile atá ar na bacáin.

Tá lucht nós* ag súil go mór le Rith 2010, féile náisiúnta úrnua a bheidh ar siúl idir 10 – 17 Márta an bhliain seo chugainn mar cheann de phríomhimeachtaí Sheachtain na Gaeilge.

Is ollrith sealaíochta gan stad atá i gceist agus beidh na mílte duine ag rith an chúrsa 1500km ó Bhéal Feirste go Gaillimh thar 7 lá agus trí 400 baile.

Tá imeacht den chineál seo, Korrika (féach físeán thuas), ar siúl i dTír na mBascach ó bhí 1980 ann agus bíonn thart ar 600,000 duine ag glacadh páirte ann gach dara bliain.

Anois beidh deis ag na Gaeil rith ar son ár dteanga agus ceilúradh a dhéanamh ar ár gcultúr ar bhealach nach ndearnadh roimhe.

Is mór an t-eagrúchán atá de dhíth chun Rith 2010 a bhainistiú ar dóigh agus táthar anois ag cur fáilte roimh iarratais ó dhaoine a mbeadh spéis acu bheith mar Bhainisteoir Imeachta le haghaidh an imeachta náisiúnta.

Conradh sealadach 6 mhí atá i gceist leis an phost agus beidh buntuarastal i gceist don phost le féidearthacht do bhónas fheidhmíochta.

Ní mór do gach iarrthóir na critéir seo a leanas a chomhlíonadh:
- Cáilíocht 3ú leibhéil
- Gaeilge scríofa agus labhartha d’ardchaighdeán
- Taithí ar bhainistíocht tionscnaimh agus ama
- Taithí ar riarachán agus bainistíocht airgeadais
- Scileanna ríomhaireachta agus teicniúla
- Scileanna maithe cumarsáide agus idirphearsanta
- Ceadúnas tiomána iomlán agus glan

Dé Céadaoin 30 Meán Fómhair 2009 an spriocdháta agus is féidir iarratas a dhéanamh trí CV a sheoladh chuig post@rith.ie

Tuilleadh eolais ag www.rith.ie

Thaitin sé go mór linn anseo in oifigí fíorúla nós* ach ní stopann an obair agus, mar atá a fhios ag ár síntiúsóirí, tá eagrán úrnua den iris ar fáil anois le cúpla seachtain anuas.

Is léir an saineolas ceoil atá ag Ben Ó Faoláin agus an mhí seo tá léirmheasanna uaidh ar an ghrúpa Afracach Tinariwen agus ar an Chornach Luke Vibert.

Léigh freisin faoi Inglourious Basterds, an saothar de déanaí ón laoch scáileáin Quentin Tarrantino; faoin tsraith nua Fran; faoin fhuirseoir Steve Cummins; faoi dhráma nua Mhancháin Magan agus faoi chúrsaí ‘clúimh’ leis an Chailín sa Chathair.

Tá an 10 gcluiche ríomhaireachta is fearr riamh roghnaithe ag ár saoi teicneolaíochta, Diarmuid Ó Muirgheasa; labhair eagarthóir nós* Tomaí Ó Conghaile leis an fhear taobh thiar den fheachtas CAINT agus tugann Seán Ó hAdhmaill léargas dúinn ar mholtaí an Bhoird Snip Nua.

Go leor ann mar is gnáth, agus beidh tuilleadh ag teacht chugat arís go luath.

Bhí foireann nós* an-ghnóthach le tamall anuas – ag obair ar an chéad eagrán eile, ag ullmhú do na míonna amach romhainn, ag tabhairt faoi fheachtas díolacháin – ach tá áthas orainn a chur in iúl daoibh go bhfuil Eagrán 11 – sea, 11 cheana féin! – ar fáil anois don phobal Gaelach.

Ar leathanach tosaigh an eagráin seo tá White Denim, a bhfuil léirmheas ar a n-albam is déanaí le léamh sa rannóg cheoil. Tá cur síos ar an fhéile scannán Guth Gafa, neart grianghraf gigeanna, léargas ar mholadh nua chun fuinneamh a ghiniúint, colún nua aerach, an Cailín sa Chathair agus léirmheas ar an Lancer Evo nua ann chomh maith, mar aon le go leor eile mar is gnáth.

Tá nuacht eile againn dár léitheoirí an mhí seo, is é sin go bhfuil 25% bainte de chostas na síntiús ar fad idir seo agus 1 Meán Fómhair!

Tá breis ioncaim de dhíth ar an iris ionas go mairfidh sí beo mar sin muna bhfuil síntiús agat cheana, ní gá duit anois ach €30 a chaitheamh chun cóip de nós* a fháil sa phost gach mí. Dar linn gur margadh iontach é seo mar sin scaip an scéal agus cabhraigh linn an iris Ghaeilge is snasta riamh a chur ar fáil daoibh.

Tuilleadh sonraí anseo.

Bhí slua breá i láthair ag bronnadh Ghradaim Chumarsáide an Oireachtais agus cé nár bhuaigh nós* aon ghradam an iarraidh seo ba dheas an rud é bheith ainmnithe agus aitheantas náisiúnta a fháil.

Ba dheas an rud é chomh maith bheith in ionad chomh gleoite le teach aíochta an tStáit agus cuireann muid fáilte roimh na forbairtí atá á ndéanamh ar na gradaim bhliantúla. Cá bhfios nach mbeidh an ócáid is mó i saol na meán Gaeilge le feiceáil ar an teilifís ar an bhliain seo chugainn?

Seo thíos liosta na mbuaiteoirí. Comhghairdeas leo ar fad!

Sraith Teilifíse na Bliana: In the Name of the Fada (Peer Pressure do RTÉ)

Pearsa Teilifíse na Bliana: Dáithí Ó Sé (TG4)

Aisteoir na Bliana: Joe Steve Ó Neachtain (Ros na Rún & Stáitse)

Sraith Raidió na Bliana: Adhmhaidin (RTÉ Raidió na Gaeltachta)

Pearsa Raidió na Bliana: Rónán Mac Aodha Bhuí (RTÉ Raidió na Gaeltachta)

Iriseoir na Bliana: Eoghan Ó Néill (An Druma Mór/Nuacht 24)

Colúnaí na Bliana: Cathal Mac Coille (Foinse)

Buaic-Ghradam Cumarsáide an Oireachtais: Seán Bán Breathnach (RTÉ Raidió na Gaeltachta)